Արևելյան Եվրոպայում հակահրթիռային համակարգի շուրջ Ամերիկայի Միացյալ Նահանգները և Ռուսաստանի տարաձայնությունները շարունակում են: Մինչդեռ ԱՄՆ-ի արտգործնախարար Կոնդոլիսա Ռայսը հայտարարել է, որ Ամերիկան հետևողական կլինի իր դաշնակիցներին Իրանի կողմից հնարավոր հրթիռային հարձակումից պաշտպանելու հարցում, իսկ նրա ռուս գործընկեր Սերգեյ Լավրովը պնդել է, որ Թեհրանի հրթիռների ազդեցության շառավիղն բավականաչափ մեծ չէ, որպեսզի արդարացնի հակասությունների առարկա դարձած համակարգի հաստատումը:
Այս շաբաթ Իրանում իրականացված հրթիռային փորձարկումների վերաբերյալ խոսելիս Ռուսաստանի արտգործնախարար Սերգեյ Լավրովը Մոսկվայում`մամլո ասուլիսի ժամանակ, ասել է, որ պաշտոնական Թեհրանից եկող հրթիռային հնարավոր վտանգից բխող հակասությունները միայն բանակցությունների միջոցով է հնարավոր լուծել: Լավրովը կրկին անգամ մերժել է ԱՄՆ-ի առաջարկը` հակահրթիռային համակարգ հիմնել Լեհաստանում և Չեխիայում պաշտպանվելու Իրանի կողմից հնարավոր հարձակումից:
Ռուսաստանի արտգործնախարարն ասել է, որ փորձարկումները ցույց են տվել, որ Իրանն ունի հրթիռներ, որոնց հասանելիության շառավիղը երկու հազար կիլոմետր է, ինչը մեկ անգամ ևս հաստատել է Ռուսաստանի նախկին պնդումը, որ Կենտրոնական Եվրոպայում հակահրթիռային համակարգի տեղակայումը անհրաժեշտ չէ այդպիսի հրթիռներին հետևելու և դրանց պատասխանելու համար:
Ռուսաստանը համարում է, որ Կենտրոնական Եվրոպայում տեղակայված համակարգը սպառնում է Ռուսաստանի անվտանգությանը:
ԱՄՆ-ի արտգործնախարար Կոնդոլիսա Ռայսը երեքշաբթի օրը Պրագայում համաձայնագիր է ստորագրել`պաշտոնական Մոսկվայի կողմից մերժվող համակարգի շրջանակներում Չեխիայում հրթիռային վերահսկման կայան ստեղծելու շուրջ: Վրաստանի մայրաքաղաք Թբիլիսիյում հինգշաբթի օրը ելույթ ունենալով` արտգործնախարար Ռայսն ասել է, որ ԱՄՆ-ը կպաշտպանի իր դաշնակիցներին: “Մենք ամենանայն լրջությամբ ենք վերաբերվում մեր դաշնակիցներին պաշտպանելու պարտականությանը, և ոչ մեկ չպետք է կասկած ունենա այդ առնչությամբ: Մենք նաև պետք է հետևողական լինենք հակահրթիռային պաշտպանության համակարգի հարցում, որը կխոչընդոտի Իրանի սպառնալիքներին և ռազմատենչ քաղաքականությանը, քանի որ նրանց հրթիռներն իրենց նպատակին չեն հասնի:”
Իրանը հաղորդել է չորեքշաբթի և հինգշաբթի օրերին մի քանի տիպի հրթիռների փորձարկման մասին: Դրանց երկու հազար կիլոմետրանոց շառավիղը կարող է հասնել Իսրայել և Մերձավոր Արևելքում և Հարավային Ասիայում ԱՄՆ-ի այլ դաշնակիցներին:
Ռուսաստանից անկախ ռազմական վերլուծաբան Պավել Ֆելգենհաուերն ասել է, որ Իրանը հինգից տաս տարիների ընթացքում կարող է մշակել երկփուլ հրթիռային տեխնոլոգիա, ինչը զգալիորեն կընդլայնի հրթիռների ազդեցության շառավիղը և թույլ կտա դրանց հասնել մինչև Արևմտյան Եվրոպա: Ֆելգենհաուերն ասել է, որ բացի Ռուսաստանից և ԱՄՆ-ից մեկ տասնյակից ավել պետություններ, այդ թվում`Իսրայելը, Հնդկաստանը և Ճապոնիան, նույնպես ունեն նման զենքեր:
Վերլուծաբանն ասել է, որ երկփուլ տեխնոլոգիան հիսուն տարվա պատմություն ունի: Իրանին անհրաժեշտ կլինի լուծել որոշ տեխնիկական խնդիրներ, սակայն այլոց դա արդեն հաջողվել է, և անհրաժեշտ տեղեկատվությունը հնարավոր է ձեռք բերել: Իսկ Իրանը կարող է դա անել:
ԱՄՆ-ը կասկածում է, որ Իրանը փորձում է միջուկային զենք մշակել, սակայն պնդում է, որ դա քաղաքացիական նպատակներով էներգիայի ստացման ծրագիր է: Ռուսաստանն օգնել է Իրանին Բուշեհրթում միջուկային ռեակտոր կառուցել և միջուկային վառելիք է տրամադրում այդ կայանի համար:
Հոդվածը ուղարկել
Տպագիր տարբերակ
