ABŞ-ın vitse-prezidenti Dik Çeyninin Azərbaycana iki günlük səfəri başlayıb.

     Cənab Çeyni ilk olaraq BP və Sevron şirkətlərinin yerli nümayəndələri ilə ayrılıqda görüş keçirib. ABŞ-ın Azərbaycandakı səfirliyindən "Amerikanın səsi" radiosuna bildiriblər ki, hər iki şirkətin nümayəndəsi Azərbaycanın enerji sahəsində durumu, daha geniş mənada Xəzər regionunda xüsusilə, Rusiyanın bu yaxınlarda Gürcüstanda hərbi əməliyyatlarından sonra yaranmış vəziyyət barədə öz fikirlərini bölüşüb. Görüşdə həmçinin enerji təhlükəsizliyi kontekstində müzakirələr keçirilib, neft şirkətlərinin nümayəndələri öz fəaliyyətləri, regionun mühüm potensialı və  üzləşdikləri bəzi çətinliklər barədə də fikir mübadiləsi aparıb. 

  Vitse-prezident Dik Çeyni ABŞ-ın Bakıdakı səfirliyinin əməkdaşları ilə də görüşüb.    

    Cənab Ceyninin Azərbaycan prezidenti İlham Əliyevlə 

görüşü isə bir saatadək davam edib.

   "Turan" agentliyinin məlumatına görə, cənab Çeyni  görüşdən sonra jurnalistlərə bildirib ki, ABŞ Qafqaz bölgəsindəki müttəfiqlərinin əmin-amanlığında və rifahında dərindən maraqlıdır. "Bizim bu günkü görüşümüz Rusiyanın bu yaxınlarda Gürcüstana etdiyi hərbi müdaxilə fonunda baş tutub. Prezident Buş məni Azərbaycan xalqına və bütün regiona aydın ismarıcla göndərib: ABŞ-ın dərin və möhkəm maraqları vardır ki, sizin rifahınız və təhlükəsizliyiniz təmin olunsun".
    Cənab Çeyni həmçinin bildirib ki, ABŞ enerji resurslarının ixracı üçün əlavə marşrutların olması istiqamətində Azərbaycanla əməkdaşlıq etməkdə maraqlıdır. "ABŞ əmindir ki, biz Avropa ölkələri və Türkiyə, eləcə də Qafqaz və Mərkəzi Asiya dövlətləri ilə birlikdə işləməliyik ki, enerji resurslarının ixracı üçün əlavə marşrutlar olsun və onlar sərbəst şəkildə nəql edilsin" – deyə o qeyd edib.

   Eyni zamanda, Azərbaycanda  müstəqil politoloqlar, iqtidar və müxalifətdə olan siyasi partiya rəhbərləri ABŞ-ın vitse-prezidentinin Azərbaycana səfərini mühüm adlandırır.

    YAP icra katibinin müavini Mübariz Qurbanlı ABŞ vitse-prezidentinin səfərini "zəruri səfər" kimi qiymətləndirir. Onun fikrincə, bu səfər Azərbaycanın təhlükəsizliyinə, Dağlıq Qarabağ münaqişəsinin həlli prosesinə müsbət təsir göstərəcək. 

    Müxalifətdə olan AXCP sədri Əli Kərimli cənab Çeyninin səfərini Azərbaycana ABŞ-ın dəstəyi kimi qiymətləndirir. Onun fikrincə, bu ABŞ-ın Azərbaycanın müstəqilliyinə, enerji layihələrinə verdiyi böyük önəm hesab edilməlidir.

   Politoloq İlqar Məmmədovun fikrincə,  ABŞ Azərbaycana dəstəklə yanaşı, ölkə rəhbərliyinin mövqeyini də müəyyənləşdirmək fikrindədir.   

    Yeri gəlmişkən qeyd edim ki, ABŞ-ın vitse-prezidentinin səfəri zamanı paytaxt Bakıda ciddi təhlükəsizlik tədbirləri görülüb. Cənab Çeyninin keçəcəyi yollarda çoxsaylı təhlükəsizlik əməkdaşları var. Onunla gələn nümayəndə heyətinin yaşadığı Hyatt hotelinin qarşısında yol bağlanıb. Vitse-prezidentin səfər proqramı ilə bağlı mətbuata qabaqcadan hər hansı məlumat verilməyib.