Inkulumo phakathi kwebandla leZanu PF lamacele womabili eMDC zisungulwe ngolweSine ePretoria kweleSouth Africa. Lokhu kulandela ukulobelana phansi isivumelwamo phakathi kwamabandla la ngoMvulo, evumelana ukuthi kumele ekhulumisane kulundisiswe udaba lweZimbabwe.

Abazi ngokwenzakalayo bathi udaba olukhanya luzahlupha kunkulumo lezi ngolokuthi kubunjwe uhulumende womanyano kumbe ozaphatha intambo zombuso okwesikhatshana phambilini kokhetho olutsha lukamongameli. 

Ibandla leZanu PF libikwa likhankasela uhulumende womanyano kuthi amacele eMDC wona athi afuna uhulumende owesikhatshana ozakwandulela ukhetho olukhululekileyo. Abasiki bebunda bathi olunye udaba olukhanya luzahlupha, ngolwezijeziso ezethulelwa uhulumende kaMugabe ngamazwe afana leBritain, iAmerica kanye lamazwe aweEuropean Union. Ibandla leZanu PF lifuna izijeziso lezi zesulwe ngokuphangisa. 

UMongameli Thabo Mbeki, ongumlamulankunzi kudaba lweZimbabwe laye ubikwa ekhankasela ukuthi izijeziso lezi zesulwe njalo ubikwa ezacela inkokheli ye European Union emhlanganweni ophakathi kwamazwe alumanyano leSouth Africa kusasa ukuthi yesule lezizijeziso, esithi yikho okungaphendla indlela yokuqeda udubo lweZimbabwe. 

Ingcwethi ecubungula ezombusazwe njalo eligqwetha elilwela ilungelo loluntu uMnu Immanuel Hlabangana utshele uNtungamili Nkomo weStudio 7 ukuthi uMbeki ulakho ukuphumelela kumkhankaso wakhe. 

Kodwa uHlabangana usole ukutshiywa phandle kwenhlanganiso ezizimeleyo kunkulumo lezi esithi lokhu kuveza ukuthi injongo yazo ngeyokwabelana amantshontsho phakathi kweMDC leZanu PF, okuyinto athi ayilungelanga ikusasa yelizwe.

Ezinye Indaba ZeStudio 7...