عافیه صدیقي او د هغې زوی د جولای په ١٨مه نیټه په غزني کې له نیول کیدو وروسته پولیسو د مطبوعاتو استازو ته وښودل. دوی خپل مخونه پټ کړي وو.

هغه پاکستانۍ ساینسپوهه چې د القاعدې سره د تړاو تور ورباندې لگول شوی او امریکا یې د نیولو هڅه کوله، نن په نیویارک کې محاکمه کیږي.

یو حکومتي څارنوال د دوشنبې په ورځ وویل، عافیه صدیقي د جولای په میاشت کې د غزني په ولایت کې د والي د دفتر مخې ته نیول شوې وه. چارواکي وايي، له هغې سره داسې اسناد نیول شوي وو چې د چاودیدونکو موادو د جوړولو طریقې پکې لیکل شوي وې.

د امریکا د فدرالي تحقیقاتي ادارې یوې ډلې چې د عافیې صدیقي له نیول کیدو یوه ورځ وروسته له هغې نه د تحقیقاتو په نیت ورغلي وو. میرمن صدیقي د تحقیقاتو په ترڅ کې د یوه عسکر وسله اخیستې او پر عسکرو یې ډزې کړي وې. وروسته په ځوابي ډزو کې میرمن صدیقي زخمي شوې خو د امریکايي تحقیق کوونکو ته زیان ندې اوښتی.

که پر میرمن صدیقي باندې لگیدلي تورونه ثابت شي نه کیدای شي په ٢٠ کاله بند محکومه شي.

رپوټونه وايي، ٣٦ کلنه عافیه صدیقي چې په امریکا کې یې تحصیلات کړي دي، په ٢٠٠٣م کال کې له خپلو دریو ماشومانو سره د کراچۍ له ښار نه لادرکه شوې وه. له هغه یو کال وروسته د امریکا فدرالي تحقیقاتي ادارې اعلان وکړ چې د القاعده د ډلې د نورو مشکوکو ترهگرو تر څنگ د میرمن صدیقي د نیول هڅه کوي.  

د میرمن صدیقي وکیل، د کورنۍ غړي او د عفوې نړیواله اداره وايي، میرمن صدیقي د امریکا په یوه پټ زندان کې قید وه.