Al-Shabab

Maleeshiyada ururka Al-Shabab ayaa lagu soo warramayaa in ay saaka qabsadeen magaalada Baardheere iyo tuulada Buurdhuubo ee gobolka Gedo, iyadoo aan iska horimaad halkaais ka dhicin.  Wariyaha VOA-da ee magaalda Baydhabo ayay dad goob-joogayaal ahi u xaqiijiyeen soo galitaanka kooxda Al-Shabaab ee magaalada Baardheere.

Guddoomiyaha degmada Baardheere, Maxamad Xirsi ayaa sheegay in maamulka degamadaasi uu yahay mid aan dhinacyada is haya midkoodna amar qaadan, balse ay yihiin maamul shacabka wakiil ah.

Dhinaca kale, wariyaha VOA-da Caasha Ibrahim (Cuud) ayaa waraysi ay la yeelatay guddoomiyaha gobalka Gedo Md. Xuseen Sh. Cabdi isaga oo ku sugan degmada Ceel-Waaq waxa uu u  sheegay in uusan wax xog ah ka hayn dhaq-dhaqaaqyadan, oo uu warka ka maqlay idaacadaha.  Si kastaba ha ahaatee waxa uu sheegay in maamulka degmada Baardheere uu hoos yimaado kiisa, balse uu xiriirka dhinaca isgaarsiinta oo aan fiicnayn ay sababtay in ayan wada hadlin maamulka degmada.