Nuur Cadde

Sida uu ku soo waramayo wariyaha VOA-da ee magaalada Muqdisho Axmed Xasan Colaad, in kabadan lix qof oo ka tirsan shaqaalaha samafalka ee ka howl-gala Soomaaliya oo isugu jira ajaanib iyo Soomaali ayaa siyaabo kala duwan loogu haystaa meelo ka mida bartamaha iyo koonfurta Soomaaliya.  Waxaa isa soo taraya baaqyo ay soo jeedinayaan dhinacyo kala duwan, kuwaasoo codsanaya in si deg-deg ah loo sii daayo shaqaalahaas afduuban ee ku howlanaa arimaha samafalka.

Ra’iisul-wasaaraha DFKM ee Soomaaliya Md. Nuur Xasan Xuseen oo la hadlay idaacadda VOA-da ayaa sheegay in xukuumaddiisu ay ku dadaalayso siidaynta shaqaalaha hay’adaha gargaarka ee ku jira gacanta afduubayasha, isaga oo falalka caynkaan oo kale ah ku tilmaamay  qayb ka mida dhibaatada dalka ka jirta.

Dhinaca kale, Abwaan Abshir Nuur Faarax (Bacadlle) oo ah abwaan si wayn looga yaqaan Muqdisho iyo Soomaaliyaba ayaa ku sheegay falalka afduubka loo gaysanayo shaqaalaha ku howlan arimaha samafalka wax aan shareecada Islaamka ku jirin oo aad looga xumaado.