Boqortooyada Sucuudiga

Wasaaradda Arimaha Gudaha ee Boqortooyada Sucuudiga ayaa sheegtey in masuuliintoodu ay xireen dad tiradoodu gaarayso 701 qof, kuwaasoo lagu sheegey in ay yihiin xag-jirro ku xiriira shabakadda argagixisada Al-Qacida.  Waxaa dadkaas lagu eedeeyey in ay qorsheeynayeen in ay weeraro ku qaadaan warshadaha saliidda ee Boqortoyada Sucuudiga.

Hadal rasmi ah oo ciidamada ammaanka ee Sucuudigu ay maanta soo saareen ayeey ku sheegeen in dadkaas la tuhunsanyahay lagu qabtey weeraro kedis ah oo lagu qaaday goobo kala duwan sanadkii u dambeeyey. Dadkaas tuhumaadda loo xirey intooda badan oo ah ajaanib ka kala yimid waddamo kala duwan weli way xiran yihiin.

Wasaaradda Arimaha Guduhu waxa ay sheegtey in dadkaas mintidiinta ahi ay u abaabul sanaayeen unugyo bartilmaameed sanayey magaalada Yunbuc ee Badda Cas saaran iyo gobolka Sucuudiga ee dhaca bariga.

Waddanka saliidda qaniga ka ah ee Sucuudi Carabaabiya, waa meeshii uu ku dhashey hogaamiyha Al-Qaacida, Osama Bin Laden. Waxa mas’uuliyiinta Sucuudigu ay tan iyo sanadkii 2003dii dagaal kula jireen mintidiin weeraro ku haya ajaanibka jooga Sucuudiga iyo goobha saliidda lagu safeeyo.