Cumar Xaashi Aadan

Cumar Xashi Aadan oo ah xubin sare oo ka tirsan Isbahaysiga Dib-u-Xoreeynta Soomaaliya, haddana ku sugan magaalada Baladwayne oo gacanta ugu jidha Isbahaysigiisa ayaa sheegay in ayan u qorshaysneen in ay halkaa wax maamul ah ka dhisaan .  Md. Aadan waxa uu sheegay in ay mudnaanta koowaad siinayaan marka hore sidii ay dalka uga xoreeyn lahaayeen waxa uu ugu yeeray gumaysiga.

Isaga oo wariyaheenna magaalada Baladwayne Xuseen Xasan Dhaqani uga waramaya kulan uu maanta la yeeshay waxgaradka degmadaas ayuu mas’uulku sheegay in ayan jeclayn in ay magaalada dhexdeeda kula dagaallamaan ciidamada ay dagaalka kula jiraan ee Itoobiya, balse waxa uu intaa raaciyay in haddii ay dantu ku kallifto arinkaas, ay ku dagallami doonaan.

Shalay ayay ciidamo la aamin sanyahay in ay daacad u yihiin Maxaakimta Islaamiga ah ee dagaalka kula jirta dawladda Federaalka ee Soomaaliya la wareegeen magaalooyin dhowr ah oo ku yaal bartamaha iyo koonfurta galbeed ee Soomaaliya, kuwasoo ay ka mid tahay magaalada Baladwayne.

Dhinaca kale, isla wararka uu noo soo diray wariye Dhaqane, magaalada Guriceel ayay dadkii dagganaa ka qaxeen, kadib markii ciidamada Itoobiya iyo xoogagga diidan joogitaankooda Soomaaliya uu xalay halkaa dagaal ku dhex-maray.  Wararku waxa ay sheegayaan in ciidamada Itoobiya ee degaankaas ka dagaalamay ay yihiin kuwii ka baxay magaalada Baladweyne oo shalay la sheegay in ay la wareegeen kooxaha ka soo horjeeda xukuumadda federaalka ah.  Dagaalka ka dhacay Guriceel ayaa gaystay khasaare isugu jira dhimasho ay dhaawac, iyada oo dad badanina ay ka barakeceen magaalada sida uu ku waramayo mid ka mida dadka dagaanka.