Nuur Cadde

Ra`isal-Wasaaraha dowladda ku meel gaarka ee Soomaaliya Nuur Xasan Xuseen “Nuur Cadde” ayaa isagoo ku sugan Magaalada Nairobi ee dalka Kenya waxa uu ka hadlay xaaladda wadanka Soomaaliya ee nabadgelyada, dib-u-heshiisiinta iyo doodaha ka dhanka ah  xukuumaddiisa ee hor yaalla Baarlamaanka ku meel gaarka ah. 

Ra’iisul-wasaare Nuur Cadde ayaa isaga oo ka hadlaya nabad-galyada waxa uu qiray in ay nabad-galyo xumadu ka sii dartay muddadii ka dambaysay saxiixiddii heshiiskii  Jabuuti, isaga oo si gaar ah farta ugu fiiqay ugaarsiga lagu hayo shaqaalaha howlaha samafalka ee ka howlgala Soomaaliya.

Mar uu ka hadlayay qodabadii shirkii Jabuuti iyo sababaha ay wali colaaddu u sii jiitamayso ayuu sheegay in wali aan la gaarin xilligii ay dhaqan gali lahayd xabad-joojinta. 

Marka dhan la iska dhigo sida ay meelo badan oo ay dawladdu ka talin jirtay xilligii xukuumaddii Geeddi ay faraha uga sii baxayaan ayuu ra’iisul-wasaaraha sheegay in qorshihii ay xukuumaddiisu horgaysay barlamaanka ay ugu wayneed dib-u-heshiisiinta, walina uu ku adkaysanayo in kaligeed tahay tan kaliya ee lagu gaari karo xal waara.

Warbixin Maqal ah oo ay Maryan Qalanjo nooga diyaarisay arimahaas halkan ka dhagayso.