Shariif Xasan

Guddoomiyaha golaha dhexe ee Isbahaysiga Dib-u-xoreeynta Soomaaliya Shariif Xasan Sh. Adan ayaa sheegay in golaha dhexe ee isbahaysigoodu ansixiyay la islana qaatay heshiiskii iyaga iyo xukuumadda FKM ee Soomaaliya bishii June ku wada saxiixeen magaalada Jabuuti ee Jamhuuriyadda Jabuuti.

Shariif Xasan oo u waramayay idaacadda VOA-da oo ka hadlaya arinka ayaa sheegay in dhinaca Isbahaysiga ay kaliya u dhinnayd in ay isku yimaadaan oo ay ansixiyaan heshiiskaas, taasina ay iminka soo dhamaatay.

Mar uu ka hadlayay, waxyaabaha ka fulay heshiiska Jabuuti ayuu sheegay in ay wax badan fuleen, haseyeeshee howsha inta badan ay hadda ku harsantahay dhinaca beesha caalamka oo looga fadhiyo sidii ay ku fududeeyn lahaayeen in ay ciidamada Itoobiya waddanka ka saaraan, kuwo cusubna ay keenaan.  Shariif Xasan ayaa sheegay in sida uu ka warhayo ay beesha caalamku meel fiican marinayso dhamaystirka qodobkaas.

Todobaadkii hore ayuu barlamaanka FKM ee Soomaaliya fadhi uu ku yeeshay magaalda Baydhaba oo xarun u ah waxa ay ansixiyeen heshiiska ay xukuumaddu la gashay kooxda Isbahaysiga iyada oo uu halkaasna goob joog ka ahaa ra’iisul wasaaraha DFKM Axmed Cabdisalaan isla markaana ahaa ninka ugu sareeya wafdiga dowladda ee ka qayb-galay wada-xaajoodkii lagu gaaray heshiiska Jabuuti.

Sagaalkii bishii June ayay xukuumadda ku-meel-gaarka ah ee Soomaaliya iyo Isbahaysiga Dib-u-xoraynta waxa ay heshiis ay Qaramada Midoobay kor jooge ka ahayd waxa ay ku gaareen caasimadda Jabuuti ee Jabuuti.  Tan iyo markii heshiiska la saxiixay waxaa sii xoogaystay dagaallada ka jira Soomaaliya, iyada oo ay bilaabatay mawjad ugaarsi ah oo lagu hayo shaqaalaha hay’adaha samafalka.

Waraysgia Shariif Xasan iyo warbixin kale oo uu wariyaha VOA-da ee Jabuuti ka soo diray waxyaabihii looga hadlay kal-fadhiga Isbahaysiga Dib-u-xoreeynta Soomaaliya oo labaduba maqal ah halkaan ka dhagayso.