Meles Zenawi

Ra’iisul Wasaaraha dawladda Itoobiya Meles Zenawi ayaa si weyn u dhaliilay hoggaanka hay’adaha dawliga ah ee Soomaaliya oo uu ku eedeeyey karti-darro iyo inaysan ka go’nayn fulinta mas’uuliyaddooda.

Melse Zenawi waxa uu ku eedeeyey hogaanka Soomaaliya inay ku guul-daraysteen in la tababaro ciidamo soo celiya nabadda iyo xasilloonida Soomaaliya wakhti dhow ama mid fog.

Waxa uu sheegay in ciidamada Itoobiya loogu diray Soomaaliya si ay u taageeraan ciidamada dowladda, balse aanay ka dhignayn in ciidankiisu ay u afduuban yihiin waxa uu ku tilmaamay “ajendayaasha shakhsiga ah” ee hogaanka Soomalaiya.

Mr. Zenawi waxa uu hadalladan ka sheegay kulan 24-kii Sebtember ka dhacay New York oo ay ka qaybgaleen Madaxweynaha dalka Yugaandha, Yuweri Musaveni, kalaiyaha xoghayaha arrimahada dibada ee dalka Mareeykanka u qaabilsan Afrika Jendaye Frazer, wasiirka arrimaha dibada ee dalka Brundi, Antoinette Batumubwira, wasiirka arrimaha dibedda Soomaaliya Cali Axmed Jaamac Jengeli iyo gudoomiyaha Midowga Afrika Jean Ping.

Zenawi waxa uu ka digay in aysan suurta-gal ahayn horumar laga gaaro xaaladda murugsan ee Soomaaliya haddii aan, sida uu hadalka u dhigay, isbadal lagu samayn hogaanka.

Wasiirka Arrimaha Dibedda ee Soomalaiya Cali Axmed Jengeli oo VOA-da kala hadlay arimaha khuseeya shirka ka dhacay New York iyo hadallada la sheegay inay ka soo yeereen ra’iisul wasaaraha Itoobiya ayuu ku tilmaamaye kuwo la buunbuuniyey.  Waxa uu sheegay in baddalidda hogaanka Soomaaliya uusan ahayn arin u yaal Itoobiya ee uu yahay mid u yaal hay’adaha dawliga ah ee Soomaaliya.

Ciidamda Itoobiya ayaa Soomaaliya soo galay dhamaadkii sannadkii 2007-dii, markaas oo ay xukuumadda federaakla ku-meel-gaarka ah ka caawisay in ay xukunka ka tuuraan xukunkii Maxaakimta Islaamiga ah ee xilligaa ka talinayay inta babadan koonfurta Soomaaliya.  Tan iyo wixii xilligaa ka dambeeyayna waxaa ciidamada Itoobiya iyo kuwa xukuumadda federaalka ahba lagala horyimid dagaallo goos-goos ah oo ay wadaan kooxo Islaamiyiin xag-jira kaasoo ay ka dhasheen khasaare aad u baaxad wayn oo isugu jira dhimasho iyo barakac aad u wayn.