Afhayeenka Madaxwaynaha Soomaaliya

Afahyeenka madaxwaynaha dawladda federaalka ku meel-gaarka ah ee Soomaaliya Xuseen Maxamed Maxamuud Xuubsireed ayaa sheegay in maxkamadda sare ay burisay go'aankii uu barlamaanka federaalka Soomaaliya ku hor istaagay xubno wasiirro ah oo horay shaqadooda isaga casilay in ay xukuumadda dib ugu soo noqdaan.

Afhayeenka oo maanta shir jaraa'id ku qabtay xarunta madaxtooyada ee Muqdisho ayaa sheegay in maxkamadda sare go'aanka soo saartay 12-kii Okotoobar, kadib markii ay dib u eegtay qoraalladii arinta khuseeyay ee ay horay isku waydaarsadeen madaxwaynaha iyo guddoonka sare ee barlamaanka.

Dhowr iyo toban wasiir ayaa xilalkii ay hayeen iska casilay xilligii uu taagnaa khilaafkii madaxda sare ee federaalka, iyada oo khilaafkaas lagu soo dhameeyay magaalada Addis Ababa.  Qodabadii heshiiska ayaa waxaa ka mid ahaa in wasiiradii iscasilay ay dib ugu soo noqdaan xukuumadda, haseyeeshee waxaa arintaa si gaar ah uga horyimid golaha barlamaanka Soomaaliya inkasta oo ay ansixiyeen dhammaan qodabadii kale ee heshiiska.

Warbixin uu Xasan-Kaafi Qoyse Muqdisho ka soo diray, halkan ka dhagayso.