Dowlad-goboleedka Puntland

Ciidamada badda Puntland oo ay wehelinayaan kuwa ammaanka ayaa awood millatari kusoo furtay markab u rarnaa ganacsato Soomaaliyeed, kaasoo ay dhawaan burcad-badeed ka qafaasheen xeebaha gobolka Bari ee dowlad-goboleedka Puntland.

Howlgalkan oo ka dhacay inta u dhexeeysa Bandar-bayla iyo Eyl ayaa sida uu sheegay wasiirka dekadaha Puntland Dr. Axmed Siciid Aw-Nuur waxaa ku dhaawacmay laba askari.  Wasiirku waxa uu sheegay in shaqaalihii markabka oo ahaa 11, sagaal ka midana ay ahaayeen ajnabi ay kulligood bad-qabaan.

Ciidamada amniga Puntland ayaa weerar ku qaaday burcad-badeedda oo qabsaday markabkan 10-kii bishan iyada oo ay weerarkii hore ku dhinteen saddex qof.  Howlgalka ayaa hakad galay kadib markii odayaal-dhaqameed isku dayeen in ay afduubka markabka si nabad-galyo ah ku soo dhameeyaan, haseyeeshee lagu guul daraystay.

Waa markii ugu horaysay ee maamulka Puntland uu awood ciidan kala-hortago howlgallada burcad-badeedda Soomaalida, kuwaasoo xarumaha ugu waawayn ku leh dawlad-goboleedka Puntland. 

Faahfaahin dheeraad ah ka dhagayso warbxinta Cabdulqaadir Nuunoow

Waraysi uu siiyay VOA-da ayuu madaxwayne Cadde Muuse ku sheegay in maamulkiisu wax wada-xaajood ah la galayn burcad-badeedda uuna la dagaallami doono wax kasta oo ay ugu kacdo.  Xilligan qiyaastii 10 markab iyo shaqaalohooda ayaa lagu haystaa xeebaha Soomaaliya.