Astaanta NATO

Xulafada NATO ayaa sheegtay in todoba ka mid ah maraakiibteeda ay u dirayso Soomaaliya si ay gacan uga gaystaan dagaalka lagula jiro burcad-badeedda isla markaana ay waardiye uga qabtaan maraakiibta ku safraya gobolka dhibaatadu ka taagan tahay.

Hadal ay maantaa oo Arbaca ah soo saartay ayay Xulafdu ku sheegeen in maraakiibta la diray ay ka jawaabayaan codsigii Hay’adda Qaramada Midoobay ee ahaa in la ilaaliyo shixnadaha Hay’adda Cunnada Adduunka ee WFP ee gargaarka u sida Soomaaliya.

Hadalkan waxaa lagu sheegay in maraakiibtu ay gudbeen Kanaalka Suways iyaga oo gudan doona waajibka ka saaran la dagaalanka burcad-badeedda iyo in ay booqdaan Waddamada xiriirka la leh NATO.

NATO waxa ay sheegtay in farsamada rasmiga ah ee ay u gudanayso howlaha ka dhanka ah dhaq-dhaqaaqa burcad-badeedda aan wali dhamaystirin.

Dhinaca kalena, urur qaabilsan howlaha maraakiibta ayaa sheegay in markab kale oo ah nooca ganacsiga lagu afduubay xeebaha Soomaaliya.

Afhayeen u hadlay Xafiiska Caalamiga ah ee Howlaha Maraakiibta ayaa sheegay in markab ka diiwaan gashan dalka Filibiin oo ay la socdeen shaqaale gaaraya 21 qof, lagu qabsaday Gacanka Cadmeed maanta oo Arbaca ah, kaasoo isaga gooshayay Bariga Dhexe iyo Aasiya.

Afduubka maanta ayaa ka dhigaya tirada maraakiibta ay weerareen burcad-badeedda Soomaalida 73.  Kow iyo toban ka mida maraakiibtaas waxa hadda loo haystaa madax-furasho, kuwaas oo uu ku jiro markab laga leeyahay Yukraaniya oo sida 33 taangi iyo hub kale oo culus, kaasoo bishii hore la soo qafaashay.  Burcad-badeedda ayaa ku han-jabay in ay qarxin doonaan markabka MV Faina haddii aan la bixin siddeed milyan oo madax-furasho ah.