صوبہ سرحد کے جنوبی ضلعے ہنگو میں مبینہ طالبان عسکریت پسندوں کے خلاف سیکیورٹی فورسز کی کارروائی اتوار کے روز بھی جاری رہی۔فوج کے ترجمان نے بتایا ہے کہ کارروائی کے دوران 15 شر پسند ہلاک اور 60 کو گرفتار کر لیا گیا ہے۔

دوسری طرف ہنگو میں مقامی حکام نے بتایا ہے کہ سیکیورٹی فورسز نے نواحی علاقے توراواڑائی میں گھر گھر تلاشی  کے دوران مبینہ طالبان عسکریت پسندوں کے گھروں کو دھماکا خیز مواد سے اُڑا دیا ہے، اس کے ساتھ تورا واڑائی، زر گری، دو آبہ اور ناریاب میں سیکورٹی فورسز کے دستے مسلسل گشت کر رہے ہیں۔

حکام نے فرنٹیر کانسٹیبلری کے ایک قلعے پر عسکریت پسندوں کے حملے کو پسپا کرنے کا بھی دعویٰ کیا ہے۔ دوآبہ میں کرفیو بدستور نافذ ہے اور مبینہ عسکریت پسندوں کے ٹھکانوں کی تلاش جاری ہے۔

ادھر ہنگو شہر میں گزشتہ 11 دنوں سے جاری کرفیو میں نرمی کی گئی ہے، تاہم سڑکوں پر آمد و رفت مکمل طور بند ہے۔