چین نے دارالحکومت بیجنگ میں ڈرائیونگ کی نئی پابندیاں نافذ کی ہیں جن کے تحت اگلے ماہ کے اولمپکس کے موقع پر دس لاکھ سے زیادہ کاروں کو سڑکوں پر آنے سے روک دیا گیا ہے۔

اتوار کے روز سے نافذ ہونے والے یہ ضابطے 20 ستمبر تک روبہ عمل رہیں گے اور ان کی رو سے کاروں پر ایک دن چھوڑ کر سڑکوں پر آنے کی پابندی ہوگی جس کا انحصار اس بات پر ہوگا کہ آیا اُس کی لائسنس پلیٹوں کے نمبر جفت پر ختم ہوتے ہیں یا طاق پر۔

حکومت کو امید ہے کہ بیجنگ کی کل 33 لاکھ کاروں میں سے تقریباً نصف کوسڑکوں پر آنے سے روک کر آلودگی میں کمی کی جاسکتی ہے۔توقع ہے کہ ان پابندیوں کی وجہ سےہر روز 30لاکھ سے زیادہ افراد پبلک ٹرانسپورٹ استعمال کریں گے۔

ہفتے کے روز بیجنگ میں تین نئی ریلوے لائنیں اپنے مقررہ شیڈول سے تقریباً ایک ماہ تاخیر سے اور اولمپکس کے افتتاح سے صرف تین ہفتے قبل کھول دی گئیں۔ان نئی ریلوے لائنوں کی تعمیر پر تین ارب ڈالر سے زیادہ لاگت آئی ہے۔