ایڈز کی وبا کے بارے میں اقوام متحدہ کی نئی رپورٹ میں بتایا گیا ہے  کہ گذشتہ چند سالوں میں ایڈز کے علاج اور ادویات میں اضافہ ہوا ہے اور ایڈز سے منسلک شرح اموات کم ہوتا جا رہا ہے۔ تاہم رپورٹ کے مطابق علاج پانے والے ہر دو افراد کے مقابلے میں مزید  پانچ افراد اس مرض سے متاثر بھی ہوتے ہیں۔

یو این ایڈز کے ڈائرکٹر پیٹر پویٹ کا کہنا ہے کہ یہ ان کے محکمے کی سب سے پازیٹو رپورٹ ہے۔ ان کا کہنا ہے کہ دو سالوں میں پہلی مرتبہ ایڈز کے علاج اور معلوماتی پروگراموں کی وجہ سے ایڈز کی شرح اموات میں کمی واقع ہوئی ہے اور  دنیا کے ترقی یافتہ ممالک میں ایڈز کے30 لاکھ مریض اینٹی رٹرووائرل ڈرگ  سے مستفید ہو رہے ہیں۔

کئی ممالک میں ایڈز کی جانب لوگوں کے روئیے میں بھی تبدیلی آئی ہے۔ یو این پاپولیشن فنڈ کی ایگزیکٹو ڈائریکٹر سریا عبید کا کہنا ہے کہ یہ بہتر تعلیم کا نتیجہ ہے۔

2007 میں ایچ آئی وی اور ایڈز سے منسلک پروگراموں کو دس ارب ڈالر کی امداد فراہم کی گئی۔ لیکن کم از کم 8 ارب ڈالر مزید درکار تھے۔ اس شعبے میں ترقی برقرار رکھنے کے لئے فنڈنگ میں کم از کم 50 فی صد اضافہ ضروری ہے۔