چیک ریلوے کے عہدے داروں کا کہنا ہے کہ مشرقی جمہوریہ چیک میں ایک منہدم پل پر مسافر ٹرین کے حادثے میں چھ افراد ہلاک اور کم ازکم 31 زخمی ہوگئے۔

چیک ریلوے کے ایک ترجمان ریڈک جوکلک نے کہا ہے کہ یہ حادثہ جمعے کی صبح  دارالحکومت پراگ سے تقریباً 340 کلومیٹر دورسٹوڈنکا قصبے کے قریب ہوا۔  انہوں نے کہا کہ جب مسافر گاڑی پل سے ٹکرائی تو اس وقت اس کی رفتار 140 کلومیٹر فی گھنٹہ تھی۔

ریلوے کے ترجمان نے کہا کہ پل  زیرِ تعمیر تھا  اور ممکن ہے کہ مسافر گاڑی وہاں پہنچنے کے نتیجے میں وہ گر گیا ہو۔

ترجمان نے کہا کہ گاڑی کا انجن اور اس کی پہلی چھ بوگیاں پٹری سے اتر گئیں۔  ترجمان کا کہنا تھاکہ ہلاک ہونے والوں میں پانچ عورتیں اور ایک مردشامل ہے۔ چیک ٹیلی وژن کی ایک رپورٹ میں کہا گیا ہے کہ گاڑی میں 400 افراد سفر کررہے تھے۔ ترجمان نے کہا ہے کہ مسافر گاڑی پولینڈ کے شہر کراکو سے پراگ  جارہی تھی۔