آندھرا پردیش میں گذشتہ 24گھنٹوں سے جاری موسلا دھار بارش نے بھاری تباہی مچائی ہے۔

صوبے بھر میں بیس سے زائد افراد کی ہلاکت اور متعدد کے زخمی ہونے کی اطلاع ہے جب کہ سینکڑوں گاؤں پانی میں گھر چکے ہیں۔

دارالحکومت حیدرآباد میں گذشتہ 60برسوں میں اب تک کی سب سے بھیانک بارش ہوئی جِس میں خلیجِ بنگال میں ہوا کےدباؤ میں کمی کے اثر سے جمعے کی شام سے بارش کا آغاز ہوا اور ہفتے کی شام سے یہ سلسلہ جاری ہے۔

حیدرآباد کے کئی علاقوں میں مکانات منہدم ہونے سے 11افراد ہلاک ہوگئے جب کہ بجلی کی تاریں گرنے سے چار افراد ہلاک ہوگئے۔

پہلی مرتبہ حیدرآباد کے متمول علاقوں میں پانی داخل ہوگیا اور عوام کو محفوظ مقامات پر منتقل کرنے کے لیے کشتیوں کا استعمال کیا گیا۔

بارش سے ہونے والی تباہی کے سبب شہر میں عام زندگی مفلوج ہوگئی ہے۔   حکومت نے تعلیمی اداروں کو چھٹی دے دی ہے اور عوام سے اپیل کی ہے کہ بارش تھمنے تک مکانات میں رہنے کو ترجیح دیں۔

ساتھ ہی، محکمہٴ موسمیات نے مزید دو دن تک شدید بارش کی پیش گوئی کی ہے جِس کے باعث چوکسی کا اعلان کیا گیا ہے۔