بیرونِ ملک پاکستانیوں نےجولائی میں ریکارڈ رقوم وطن بھیجیں
قیصر محمود کراچی August 14, 2008
رواں مالی سال کے پہلے ماہ یعنی جولائی کے مہینے میں بیرونِ ملک مقیم پاکستانیوں نے رکارڈ 62کروڑ 70لاکھ ڈالر کی رقوم وطن بھیجیں۔یہ ملکی تاریخ میں کسی ایک مہینے میں سب سے زیادہ موصول ہونے والی ترسیلات ہیں۔ تمام تر مشکلات اور مسائل کے باوجود 30جون کو ختم ہونے والے مالی سال کے دوران ہی بیرونِ ملک پاکستانیوں کی طرف سے بھیجی گئی رقوم میں نمایاں اضافہ ہوا تھا اور تقریباً چھ ارب ڈالر ترسیلات کی مدمیں پاکستان کو وصول ہوئے۔ اقتصادی مشکلات سے دوچار ملک کے لیے یہ رقم ایک بڑی مدد کے طور پر دیکھی جاتی رہی ہے جِس نے بیرونی ادائیگیوں میں اہم کردار ادا کیا۔ ملک کا سیاسی منظرنامہ تو ہے ہی تشویش کا سبب لیکن اقتصادی مشکلات بھی کم نہیں۔ تجزیہ نگار عموماً معاشی عدم استحکام کی بڑی وجہ سیاسی بے یقینی کو بھی قرار دیتے ہیں۔ تاہم بعض تجزیہ نگاروں کا خیال ہے کہ معیشت کو درپیش مشکلات صرف پاکستان کی نہیں بلکہ دنیا کی دیگر معیشتوں کو بھی اِسی صورتِ حال کا سامنا ہے۔ تیل کی عالمی قیمتوں میں گذشتہ ایک برس کے دوران ہونے والے غیر معمولی اضافے، اجناس کی پیداوار میں کمی سے قیمتوں میں اضافہ اور اُس کے نتیجے میں افراطِ زر کی زیادہ شرح بیشتر ملکوں کا بڑا مسئلہ رہا ہے اور یہ کہ پاکستان اُس میں تنہا نہیں۔ تجزیہ نگاروں کا خیال ہے کہ بیرونِ ملک مقیم پاکستانیوں کی طرف سے نہ صرف قانونی ذرائع سے رقوم بھیجی جارہی ہیں، بلکہ اُن میں ہونے والا اضافہ انتہائی اہمیت کا حامل ہے۔ امریکہ، برطانیہ، سعودی عرب، مشرقِ وسطیٰ سمیت تمام ہی ملکوں سے بھیجی جانے والی رقوم میں اضافہ ہوا ہے۔
اس صفحے کو ای میل کیجیے
قابل چھپائی صفحہ
