بیجنگ میں منگل کےروز جمناسٹکس، ٹریک اور فیلڈ مقابلوں میں20 طلائی تمغے دیے گئے ہیں۔

عورتوں کے جمناسٹک کے فائنل مقابلے میں امریکہ کی شان جانسن نے طلائی تمغہ حاصل کیا۔ انہوں نے اپنی امریکی جمناسٹ ساتھی ناستیا لیوئیکن کو کانٹے دار مقابلے میں شکست دی جنہوں نے چاندی کا تمغہ جیتا۔

چینی جمناسٹ لی زیاؤ پنگ نے مردوں کے پیرالل بارز کے مقابلے میں کامیابی حاصل کرکے بیجنگ میں  دوسرا طلائی تمغہ حاصل کیا۔ زو کائی نے ہائی بار مقابلہ جیتنے کے لیے امریکی اتھلیٹ جوناتھن ہارٹن کو شکست دی جب کہ ان کی چینی ٹیم کے ساتھ لو چن لانگ نے مردوں کے ٹرنپولین مقابلے میں طلائی تمغہ جیتا۔

جرمن ویٹ لفٹر میتھیاس سٹینر نے مردوں کے105 کلوگرام سے زیادہ وزن کے مقابلےکل 461 کلووزن اٹھا کر طلائی تمغہ جیتا۔

 امریکہ نے دو طلائی تمغےاس وقت جیتے جب اینا ٹونی کلف نے عورتوں کا لیزر ریڈیل سیلنگ مقابلہ جیتا اور ہنری سیجودو نے مردوں کی 55 کلوگرام فری اسٹائل کشتی میں کامیابی حاصل کی۔ روس کے ماولٹ بتیروف نے 60 کلوگرام کے مقابلے میں مردوں کی فری اسٹائل کشتی میں سونے کا تمغہ حاصل کیا۔

 منگل کے روز طلائی تمغوں کے پہلے مقابلے میں جرمنی کے جان فرودینو نے مردوں کے ٹرائی تھلان میں سونے کا تمغہ حاصل کیا۔مردوں کے سیلنگ ریگاٹا میں پال گڈی سن نے لیزر کلاس جیت کر برطانیہ کو اس کا تیسرا سونے کا تمغہ دلایا۔

ارجنٹائن کے جوان ایسٹی  بان کروشے اور والٹر فرننڈو پیریز نے مردوں کے میڈیسن مقابلے میں سونے کا تمغہ جیتا۔یہ بیجنگ اولمپکس کے ٹریک سائیکلنگ کے مقابلے میں ارجنٹائن کا پہلا تمغہ تھا۔برطانیہ کی تین مرتبہ عالمی چیمپیئن کا اعزاز رکھنے والی وکٹوریہ پین ڈیلٹن نے خواتین کی ٹریک سائیکلنگ سپرنٹ میں سونے کا تمغہ حاصل کیا۔جب کہ ایک اور برطانوی کھلاڑی کرس ہوئے نے مردوں کے ٹریک سائیکلنک سپرنٹ میں طلائی تمغہ جیتا۔

مردوں کے فٹ بال ٹورنامنٹ میں نائیجیریا نے بلیجئم کو ایک کے مقابلے میں چارگول سے شکست دے دی۔ اب ان کا مقابلہ ارجنٹائن اور برازیل کےدرمیان سیمی فائنل جیتنے والی ٹیم سے ہوگا۔

غوطہ غوری کے مقابلوں میں بھی طلائی تمغے دیے جائیں گے۔اب تک  امریکہ نے مجموعی طورپر سب سے زیادہ 77 میڈل جیتے ہیں لیکن چین کے سونے کے تمغوں کی تعداد سب سے زیادہ ہے۔ اس نے 42 سونے کے تمغے حاصل کیے ہیں۔