امیتابھ بچن بالی وڈ کا وہ درخشاں ستارہ ہے جو گذشتہ چار عشرے سےعالمی اُفق پر پورے آب و تاب کے ساتھ چمک رہا ہے۔ اِس کی تازہ مثال ہے امیتابھ بچن کا ’ان فار گیٹیبل ‘ اسٹیج شو جس کے دوران لندن میں 20 ہزار ناظرین نے کھڑے ہوکر تالیوں کے ساتھ اُن کے اسٹیج پرفامنس کی داد دی۔

واضح رہے کہ بچن خاندان کا ’ان فار گیٹیبل ‘ اسٹیج شو پچھلے ایک ماہ سے دنیا کے آٹھ شہروں میں دھوم مچانے کے بعد اب لندن پہنچ چکا ہے۔ یہ پہلی بار ہے جب امیتابھ اپنی بیوی جیا، بیٹے ابھیشیک اور بہو ایشوریہ کے ساتھ اسٹیج شو کر رہے ہیں۔ اِس کے علاوہ پریتی زینٹا، مادھوری ڈکشٹ، شیلپا شیٹھی اور ریتیش دیشمکھ جیسے بالی وڈ کے چوٹی کے ستارے بھی بچن خاندان کے ساتھ تال سے تال ملا رہے ہیں۔

’ان فار گیٹیبل ‘ اسٹیج شو کے دوران جہاں آج کی نوجوان نسل کی نم ائندگی کررہے فلمی ستارے ناچ گاکر لوگوں کی ستائش حاصل کر رہے ہیں وہیں امیتابھ بچن دیوار اوراگنی پتھ جیسی سپر ہٹ فلموں کے مکالمے  اسٹیج پر پڑھ کر لوگوں کے دل و دماغ پر چھا گئے ہیں۔ یہی نہیں امیتابھ نےاپنے والد ہری ونش رائے بچن کی نظم اگنی پتھ کے کچھ اشعار بھی ناظرین کے سامنے پیش کیے۔

تقریبًا بیس سال کے طویل عرصےکے بعد  بھارت کی وِزکرافٹ انٹرنیشنل کمپنی کی دیکھ ریکھ میں بِگ بی کا اپنی فیملی کے ساتھ یہ اسٹیج شو ممکن ہو پایا ہے۔ اِس شو کے ذریعے جمع ہونے والے پیسوں سے بچن خاندان اور ’ان فار گیٹیبل ‘ شو کے دیگر اداکاروں نےسماجی خدمت کرنے کا بھی عزم لیا ہے جس کے تحت عالمی سطح پر فروری 2009ء تک سو دیہاتوں میں سولر لالٹین مہیا کی جائیں گی۔ واضح رہے کہ امیتابھ نے اپنے ورلڈ ٹور ’ان فار گیٹیبل ‘کے توسط سے گلوبل وارمنگ جیسے اہم موضوع کے لیے عوام میں بیداری پیدا کرنے کا ذِمہ لیا ہے۔

 اِس تاریخی اسٹیج شو کا آخری پڑاؤ 29 اگست کو نیدرلینڈ میں ہے۔