امیتابھ بچن مدد کے لیے تیار

بھارتی ہندی فلم انڈسٹری  کی ایک خاص بات یہ ہے کہ جب بھی قدرتی آفات کے وقت ملک کو مالی امداد کی ضرورت پڑی، بالی وڈ کے ستارے امدادی کارروائیوں کے لیے پیسہ اکٹھا کرنے  ممبئی کی سڑکوں پر نکل آئے۔

بہار میں آئے سیلاب کے قہر سے 30لاکھ سے زائد لوگ متاثر ہوئے ہیں۔ باڑھ کےپانی میں پھنسے غریب اور لاچار لوگوں کی بے بسی کو ٹیلی ویژن پر دیکھ کر امیتابھ بچن  نے اپنے بلاگ کے ذریعے واضح کیا کہ وہ بہار کے بھائیوں اور بہنوں کے لیے امدادی کے کاموں میں مدد کرنا چاہتے ہیں۔

امیتابھ کے مطابق بالی وڈ میں کسی کو ذمےداری لیتے ہوئے اس معاملے میں فیصلہ کرنا ہوگا۔ مدد کب، کیسے اور مالی طور پر کی جائے یا پھر روزمرہ کے استعمال کی چیزیں اکٹھی کی جائیں، ان اہم نقطوں کو ذہن میں رکھ کر خاکہ تیار کرنا ہوگا۔ امیتابھ نے پیش کش کی ہے کہ اگر  اِس فلاحی کام کی ذمےداری کوئی شخص لیتا ہے تو میں مدد کے لیے تیار ہوں۔ امیتابھ فی ا لوقت اپنے’اَن فارگیٹیبل اسٹیج شو‘ کے سلسلے میں پیرس میں ہیں۔

امیتابھ کے علاوہ ایکشن ہیرو سنیل شیٹھی بھی بہار میں سیلاب سے بگڑتے حالات کو دیکھ کر اتنے پریشان ہوئے کے انھوں نے ریلوے کے  وزیر لالو پرساد یادو سے فون پر گفتگو کرکے بہار کے لوگوں کو بچانے کے لیے ذاتی طور پر مدد کا وعدہ کیا۔

بہار میں سیلاب میں گھرے ہوئے لوگ

اپنی بات پر قائم رہتے ہوئے سنیل شیٹھی نے لائف جیکٹیں اور 26 عدد کشتیاں فوری طور پر بہار روانہ کردی۔ سنیل شیٹھی کی بھیجی گئی کشتیوں سے بہار کے مدھے پورا علاقے میں بچاؤ کا کام جاری ہے۔

فلم ساز پرکاش جھا بھی اداکار شیکھر سومن اور منوج باجپائی کے ساتھ مل کر اِس مشکل وقت میں بہار کے لوگوں تک کسی بھی قسم کی مدد پہنچانے کے لیے پلان تیارکر رہے ہیں۔ اطلاع یہ بھی ہے کہ شتروگھن سنہا ناراض ہیں کہ بالی وڈ کے ستاروں نے بہار کی عوام کے لیےمدد پہچانےمیں کافی تاخیرکردی۔

بھوج پوری فلم انڈسٹری کے اداکار وں کوبھی شکایت ہے کہ اگر کسی ترقی یافتہ ریاست یا ملک میں اِس صدی کا دل دہلا دینے والا سیلاب آتا تو بالی وڈ کافی پہلے مدد کے لیے دوڑ پڑتا۔