اکشے کمار اپنی فلم ’سنگھ اِز کنگ‘ کی زبردست کامیابی کے بعد بالی وڈ کے خان برادران کو ٹکردیتے نظر آرہے ہیں۔ فلم انڈسٹری میں یہ بھی سرگوشیاں ہو رہی ہیں کہ مسلسل تین ہٹ فلمیں دینے کے بعد اکشے ایک فلم کے لیے 71 کروڑ روپیے لے رہے ہیں۔ خیرسچائی جوبھی ہو اچھی بات یہ ہے کہ اکشے اپنی کامیابی کے دور میں سماجی خدمت کرنا نہیں بھولے۔ انھوں نے بہار میں آئےاِس صدی کے بدترین سیلاب سے متاثر ایک گاؤں کی بحالی کا ذمہ لینے کا اعلان کیا ہے۔ واضح رہے کہ گنگا جل اور اپرہن جیسی فلموں کے ہدایت کار پرکاش جھا نے سیلاب متاثرین کی مدد کے لیے بہار کی غیر سر کاری تنظیموں کے ساتھ مل کر پونرواس نامی ادارےکی تشکیل دی ہے۔ پرکاش جھا نے صحافیوں سے کہا کہ اکشے اب تک اُن کی تنظیم کو بہار میں امدادی کاموں کے لیے 25لاکھ روپیے دے چکے ھیں۔ جھا بہارکےسوپول ضلع کے کٹائیا گاؤں میں پانچ ہزار باڑھ متاثرین لوگوں کے لیے ریلیف کیمپ چلا رہے ہیں۔ بالی وڈ میں صرف اکشے کمار ہی نہیں جو کہ بہار کے لوگوں کی تکلیف کو بانٹنا چاہتے ہیں۔ امیتابھ نےاپنے بلاگ کے ذریعے بہار میں سیلاب میں اپنا سب کچھ لٹا چکے لوگوں کی مدد کرنے کی خواہش ظاہرکی تھی۔ شاہ رخ، عامر، اجے دیوگن، ناناپاٹیکر، منوج باجپائی، شتروگھن سنھا، شیکھر سمن نے بھی بہار میں اگلے چھ ماہ تک امدادی کیمپ چلانے والے پرکاش جھا کو ہر ممکن مدد دینے کا عہد کیا ہے۔ سلمان خان نے تو اکتوبر مہینے میں ممبئی کے اندھیری اسپورٹس کلب میں چیریٹی اسٹیج شو کرنے کا وعدہ کیا ہے۔
اس صفحے کو ای میل کیجیے
قابل چھپائی صفحہ
