جم گلمور

اب جب کہ امریکہ کے صدارتی انتخابات بہت قریب آچکے ہیں، سب کی نگاہیں اس پر مرکوز ہیں۔  کچھ لوگ اس سے ہٹ کر بھی کام کررہے ہیں۔  اور یہ کام ہورہا ہے ریاست ورجینیا میں خالی ہونے والی سینٹ کی نشست پر۔  جم گلمور اس نشست کے لیے انتخاب میں حصہ لے رہے ہیں اور ورجینیا کی پاکستانی کمیونٹی انہیں اپنی اہمیت کا احساس دلارہی ہے۔

گلمور کہتے ہیں کہ پاکستانی امریکن کمیونٹی سے تعلق رکھنے والے لوگ مکمل طورپر امریکی سیاست میں شامل ہیں۔  ہمیں اس کمیونٹی پر بہت فخر ہے۔  میں یہاں ایک سپورٹر کے گھر پر ہوں جو فنڈز اکھٹے کررہے ہیں۔  یہ فنڈز میری انتخابی مہم کے لیے ضروری ہیں تاکہ میں امریکی سینٹ میں پہنچ سکوں۔

جم گلمور 1998 سے 2002 تک ورجینیا کے گورنر بھی رہ چکے ہیں۔

ڈاکٹر مسعود فنڈ ریزنگ کی مہم میں پیش پیش ہیں۔  ان کاکہنا ہے کہ ان فنذریزنگ کا فائدہ یہ ہوتا ہے کہ منتخب نمائندہ جب ایوان میں بیٹھتا ہے تو اس کمیونٹی اور ان کے ملک کے بارے میں پیش ہونے والے بلز اور پالیسیوں پر ان کے حق میں بولنے والا شخص موجود ہوتا ہے۔

اس موقع پر جم گلمور نے کہا کہ میرے حریف نے کہا ہے کہ پاکستان دنیا کا خطرناک ترین ملک ہے مگر میں ایک مملکت کے طورپر پاکستان کی مخالفت نہیں کروں گا۔  میں یہ جانتا ہوں کہ ہمیں ان کی مخالفت کرنی چاہیے جن کی مخالفت  امریکہ اور پاکستان کررہے ہیں۔  یہ وہ لوگ ہیں جو دنیا میں بدامنی کو ہوا دے رہے ہیں۔  ہمیں ان کا مقابلہ کرنا چاہیے۔  مگر ہمیں یہ اقدام پاکستانی کی حکومت اورپاکستان کے لوگوں کے ساتھ مل کرکرنا چاہیے۔

پاکستانیوں کے ساتھ اپنے قریبی تعلق کا ثبوت جم گلمور نے اپنی گورنری کے دور میں بھی فراہم کیا ہے۔  حنیف اختر کہتے ہیں کہ کمیونٹی کی سطح پر فنڈ زیزنگ کا انعقاد امریکہ کے سیاسی نظام کا حصہ ہے اور سینٹ او ر کانگریس میں اپنے حقوق اور مطالبات کے لیے آواز اٹھانے کا ذریعہ بھی۔