مہندر کپور

بالی وڈ کے نامور گلوکارمہندر کپور کا سنیچر کی شام ممبئی کے باندرہ علاقے میں واقع اُن کی رہائش گاہ پر دل کا دورہ پڑنے کی وجہ سےانتقال ہوگیا۔  74 سالہ کپور کو حال ہی میں مہاراشٹر حکومت نے لتامنگیشکر ایوارڈ دینے کا اعلان کیا تھا۔ محمد رفیع، کشور کمار،مکیش جیسے چوٹی کےگلوکاروں کے درمیان بھی مہندر کپور کی آواز بالی وڈ میں اپنا ایک خاص مقام بنانے میں کامیاب ہوئی۔مہندر کپور کی آواز میں فل میں پکار کا سپر ہٹ نغمہ ’میرے دیش کی دھرتی سونا اُگلے ‘ان کے کامیاب فلمی سفر میں میل کاپتھر ثابت ہوا۔ اس گانے کے لیے انھیں نیشنل فلم فیئر ایوارڈ سے بھی نوازا گیا۔

پنجاب کے امرتسر شہر کےمہندر کپور کو فلموں میں گانے کے لیے پہلا بریک موسیقار سی رام چندرا نے فلم ’نورنگ‘ میں دیا۔ پھر کیا تھا محمد رفیع کو اپنا استاد ماننے والےمہندر کپور نے فلم ساز وی شانتا رام کی فلم میں اپنا پہلا گانا ’آدھا ہے چندرما رات آدھی‘ اتنی محنت اور لگن سے گایا کہ بالی وڈ اور سنیمابینوں نے ان کی آواز کو نوٹس کیا۔

ساٹھ کی دہائی میں مہندر کپور، ساحر اور موسیقار روی کی تکون نے یکے بعد دیگرے کئی کامیابیاں حاصل کیں۔ فلم ’گمراہ‘ کا یہ گانا لوگ آج بھی گنگناتے ہیں، ’چلو اک بار پھر سے اجنبی بن جائیں ہم دونوں۔‘

مہندر کپور کے فلمی کیرئیر کو سنوارنے میں بی آر چوپڑا کا بہت بڑا ہاتھ تھا۔ فلم دھول کا پھول کے مقبول گانے ’تیرے پیار کا آسرا چاہتا ہوں ‘ نے لوگوں کومہندر کپور کی جادوئی آواز کا دیوانہ بنا دیا۔ فلم گمراہ،ہمراز  اور روٹی کپڑا اور مکان  میں بہترین گائیکی کے لیےمہندرکپور کو فلم فئیر ایواڈز بھی دیے گئے۔ تقریبا پانچ دہائیوں میں پھیلے گائیکی کے سفر میں مہندر کپور نے 25 ہزار سے زائد نغموں کواپنی آواز دی۔

ہندی فلم انڈسٹری کےعلاوہ مراٹھی فلموں میں بھی مہندرکپور کا بول بالا تھا۔ نامور مراٹھی اداکار دادا کونڈ کے کی تمام فلموں کے نغمےمہندر نے ہی گائے۔ بھارتی حکومت نے اُنھیں پدم شری کا خطاب دے کر ان کی گائیکی کے فن کو سلام کیا۔ بھارت کے وزیراعظم اور صدر سمیت پورا ملک اِس ان مول گلوکار کو خراج عقیدت پیش کر رہا ہے۔