پاکستان میں چاندرات کو بڑی گہماگہمی ہوتی ہے۔ مارکیٹیں اور بازار رات بھر کھلے رہتے ہیں اور دن طلوع ہونے تک عید کی خریداری جاری رہتی ہے۔بازاروں میں خاص طور پر چوڑیوں، زیورات اور مہندی کی دکانوں پر رش کاوہ عالم ہوتا ہے کہ تل دھرنے کی جگہ نہیں ہوتی ۔امریکہ میں آباد پاکستانی اپنی اس روایت کو برقرار رکھنے کی کوشش کررہے ہیں اور اس روایت میں ہر گذرنے والے برس میں مزید نکھار آرہا ہے۔

امریکی شہروں کے ان علاقوں میں جہاں پاکستانی اور مسلم کمیونٹی کی تعداد زیادہ ہے ، وہاں ایسی دکانیں موجود ہیں جہاں سے پاکستانی ثقافت اور روایات سے وابستہ اشیاء مل جاتی ہیں۔ چاندرات کے موقع پر ان دکانوں پر خواتین کا رش نظر آتا ہے اور پاکستان سے ملتے جلتے مناظر دکھائی دیتے ہیں۔

اکثر پاکستانی گھرانوں میں چاند رات کے موقع پر خاصی گہماگہمی دکھائی دیتی ہے۔ یہ رات عید کی تیاریوں میں گذرتی ہے۔ اس موقع پر دوست احباب کو بھی بلا لیا جاتا ہے۔ مہندی ، چوڑیاں، زیورات، پاکستانی ملبوسات  اور اس کے ساتھ ساتھ عید کی مخصوص ڈشز اور گپ شپ چلتی رہتی ہے۔