اکشے کمار فلم چاندنی چوک ٹو چین میں

سنجے دت، عامر خان ، گوندا، امیتابھ بچن، ابھیشیک بچن، سلمان خان اور فرحان اخترمیں ایک بات جو یکساں ہے وہ یہ کہ اِن تمام بالی وڈ کے ستاروں نے گلوکاری کے شعبے میں بھی اپنی قسمت آزمائی ہے۔ اور اب اِس فہرست میں بہت جلد اکشے کمار کا نام بھی جڑنے والا ہے۔ فلم ساز نکھل اڈوانی کی نئی فلم "چاندنی چوک ٹو چین" کا ٹائٹل ٹریک خود اکشے کمار اپنی آواز میں گائیں گے۔ اطلاعات کے مطابق یہ نئی فلم خود بالی وڈ کے کھلاڑی نمبر ون اکشے کی اصل زندگی سے متا ثر ہو کر بنائی جارہی ہے۔

یہ پہلی بار ہے جب اکشے کسی فلم کے لیے باقاعدہ پورا ایک نغمہ اپنی آواز میں گائے گے۔ اِس سے قبل اکشے نےفلم "سنگھ از کنگ" کے لیے تھوڑا بہت ریپ اپنی آواز میں گنگنایا تھا۔ تاہم چاندنی چوک ٹو چین فلم میں پہلی بار اکشے کمار پاپ گروپ ریدھم ڈھول باز کے ساتھ ایک پورا ہندی گانا اپنی آواز میں گائیں گے۔

فلم چاندنی چوک ٹو چین میں اکشے کے ساتھ دیپیکا پڈوکونے ہیں۔ اسی ماہ اکتوبر میں اکشے گانے کو اپنی آواز میں ریکارڈ کریں گے۔ اور فلم میں بھی اس گانے کو اکشے کمار پر ہی فلمایا جائے گا۔ فلم چاندنی چوک ٹو چین اگلے سال کے اوائل میں ریلیز ہوگی۔

  واضح رہے کہ کہ اکشے کمار کی اصل زندگی فلم انڈسٹری جوائن کرنے سے قبل کافی اتار چڑھاؤ سے دوچار تھی۔ آج بھلے ہی بالی وڈ کا یہ سپر ایکشن ہیرو ایک فلم کے لیے کروڑوں روپیے لے رہا ہے، پر ایک وقت ایسا بھی تھا جب اصل زندگی میں دو روٹی کمانے کے لیے اکشے نے ہانگ کانگ میں ویٹر کی نوکری کی۔ اور اپنی زندگی کے اسی سچ کو اکشے فلم چاندنی چوک ٹو چین کے ذریعے لوگوں سے روبرو کرائیں گے۔

ہندی فلم انڈسٹری میں بنا کسی گاڈفادر کے شہرت کی بلندیوں کو چھو کراکشے نے ثابت کر دیا کہ محنت اور لگن سے کیا گیا کام ہمیشہ بہتر نتیجے دیتا ہے۔ اکشے نے ٹوئنکل کھنہ سے شادی کی ہے اور ان کا ایک بیٹا بھی ہے۔