بھارت کے قومی سلامتی کے مشیر نے پیر کے روز نئی دہلی میں سری لنکا کے نمائندے کو طلب کیا اور تامل باغیوں کے خلاف سری لنکا کی شدید فوجی کارروائی کے دوران تامل شہریوں کی ہلاکتوں کے بارے میں تشویش اور ناپسندیدگی کا اظہار کیا ۔

ایم کے نرائنن نے سری لنکا کے ڈپٹی ہائی کمشنر جی جی اے جی پالی تھا گا نیگوڈا سے ملاقات کی۔ نرائنن نے کہا کہ بھارت چاہتا ہے کہ سری لنکا مزید تحمل سے کام لے اور تامل اقلیتی کمیونٹی میں بڑھتے ہوئے عدم تحفظ  کے احساس کا تدارک کرے۔

بھارت کی جنوبی ریاست تامل ناڈو کے سری لنکا کے تاملوں کے ساتھ ثقافتی اور جذباتی رابطے ہیں۔

سری لنکا کے سرکاری عہدے داروں نے گذشتہ ہفتے کہا تھاکہ عام شہریوں کو بتادیا گیا تھا کہ شمالی علاقے میں سرکاری فوجیوں کی آمد سے تامل ٹائیگرباغیوں کے انتظامی ہیڈ کوارٹرز کلی نوچی کے ارد گرد کے علاقے کو چھوڑ کرچلے جائیں۔