انڈین پریمیئر لیگ میں کولکوتہ کی کرکٹ ٹیم کو خرید کر کرکٹ کے کھیل میں سرمایہ لگانے کےبعد بالی وڈ کے سپر اسٹار شاہ رخ خان نے اب جائیداد کا کاروبار کرنے کی ٹھان لی ہے۔ ہندی فلم انڈسٹری کے بازی گر شاہ رخ نےخلیجی ممالک میں متحدہ عرب امارات کی ریئل اسٹیٹ کمپنی ٹی ایس اے انٹرنیشنل اینویسٹ مینٹ کے اشتراک سے کاروبار شروع کرنے کا اعلان کر دیا ہے۔

 شاہ رخ کے مطابق ان کا یہ رہائشی تعمیراتی منصوبہ عرب ممالک اور امارات کے عوام کے لیے تحفہ ہے، جو بالی وڈ فلموں کوتوقعات سے زیادہ بزنس دیتے آرہے ھیں۔

بالی وڈ کے بادشاہ کے تقریباً 22 کروڑ روپے کے پراپرٹی پروجیکٹ کا نام ’شاہ رخ خان بولی ورڈ‘ ہے،جو کہ رس الخیمہ کے الدانہ جزیرے پر تعمیر کیا جائے گا۔ اطلاعات کے مطابق دس عدد رہائشی ٹاور وں کی تعمیرکے ابتدائی دور میں شاہ رخ لاس اینجلس میں مقیم آرکیٹیکٹ ٹونی اشائے کے ساتھ مل کر پروجیکٹ کے خاکے کو تیارکریں گے۔ ’ شاہ رخ خان بولے ورڈ‘ میں مکان خریدنے والوں کو اپنے ہیرو کی شخصیت کی چھاپ گھر کےہر کونے میں ملے گی۔

کہتے ہیں شاہ رخ خان جب پہلی بار ممبئی آئے تو انھوں نےرات کھلے آسمان کے نیچے چوپاٹی کے ساحل پر سوکے گزاری تھی۔ اس وقت شاہ رخ نے اپنےدوست سے وعدہ کیا کے ایک دن ایسا آئے گا جب وہ ممبئی کی سب سے اونچی عمارت میں گھر خریدیں گے۔ شاید خود شاہ رخ کو اس بات کا علم نہیں تھا کہ اُن کی زبان سے نکلا ہر لفظ مستقبل میں سچ ہو جائے گا۔

 آج پوری ممبئی کی چنندہ بہترین رہائش گاہوں میں شاہ رخ کا آشیانہ ’منت‘ بھی شامل ہے۔  کسے پتا تھا کہ فلم دیوانگی سے بالی وڈ میں قدم رکھنے والےشاہ رخ ایک دن عمارتوں کی تعمیر کے کاروبارمیں دل چسپی دکھائیں گے۔

’شاہ رخ خان بولی ورڈ‘ پروجیکٹ اگلے چارسال میں تیار ہو جائے گا۔ رہائشی ٹاورمیں ڈیزائنر اسٹوڈیو کے ساتھ ایک اوردو بیڈروم کے گھراورٹاؤن ہاؤس دنیا کے بہترین اور جدیدآرام وآرائش کے سامان سےلیس ہوں گے۔ شاہ رخ کے علاوہ ہالی وڈ اسٹار بریڈ پٹ ، ٹینس کھلاڑی بورس بیکراور گولف کھلاڑی ٹائیگر وڈز کے سگنیچر ہاؤسنگ پروجیکٹ بھی بہت جلد شروع ہونے کی امید ہے۔