میک کین وسکانسن میں

ری پبلیکن پارٹی کی طرف سے صدارتی امیدوار جان میک کین نے انتخابات سے تین ہفتےقبل امریکیوں کو حالیہ معاشی بحران سے نکالنے کے لیے نیا معاشی منصوبہ پیش کر دیا ہے۔

سینیٹر میک کین نے ریاست پین سلوینیا میں اپنے حامیوں سے خطاب کرتے ہوئے کہا کہ ان کے منصوبے کے تحت بےروزگاری الاؤنس پر ٹیکس کو ختم کر دیا جائے گا اور ریٹائرڈ ملازمین کو اپنی جمع پونجی بچانے میں مدد دی جائے گی۔ انھوں نے کہا کہ ٹیکسوں میں کٹوتی سے نئی ملازمتوں کے مواقع پیدا ہوں گے۔

میک کین نے اس تجویز کا بھی اعادہ کیا کہ حکومت برے رہائشی قرضوں کو آسان سرکاری قرضوں میں بدل دے تاکہ ان لوگوں کی مدد ہو سکے جنھوں گھروں سے انخلا کا خطرہ ہے۔

میک کین کی یہ تجاویز اپنے حریف براک اوباما کے ساتھ مذاکرے سے ایک روز قبل آئی ہیں۔ رائے عامہ کے جائزوں میں اوباما کو میک کین پر سبقت حاصل ہے۔

سینیٹر اوباما نے بھی پیر کے روز اپنا معاشی منصوبہ پیش کیا تھا۔ اس منصوبے کی خاص بات ان کمپنیوں کے لیے ٹیکسوں میں عارضی چھوٹ شامل تھی جو امریکہ میں ملازمت کے مواقع پیدا کرتی ہیں۔