اب جب کہ وائٹ ہاؤس کے  لیے صدارتی مقابلے میں تین ہفتے سے بھی کم وقت باقی رہ گیا ہے،امریکی صدارتی امیدوار جان میک کین اور براک اوباما نے بدھ کی رات ٹیلی وژن پر آخری مباحثے میں شرکت کررہے ہیں۔

توقع  ہے کہ نیویارک میں ہوفسٹرا یونیورسٹی میں یہ مباحثہ امریکی اقتصادی بحران پر مرکوز ہوگا۔ یہ وہ مسئلہ ہے جس نے اوباماکو اپنے ری پبلیکن حریف پر قومی پیمانے پر اور اہم انتخابی ریاستوں میں سبقت لینے میں مدد دی ہے۔

نیویارک ٹائمز اور سی بی ایس نیوز کی جانب سے کرائے گئے رائے عامہ کے ایک جائزے سے ظاہر ہوا ہے کہ ڈیموکریٹک سینیٹر اوباما کو جان میک کین پر 39  کے مقابلے پر 53 فی صد تک کی برتری حاصل ہے۔بدھ کے روز رائیٹرز، سی سپین اور زاگ بی کی جانب سے کرائے گئے رائے عامہ کے ایک اور جائزے سے ظاہر ہوا ہے کہ اوباما کو جان مک کین پر قومی پیمانے پر چار فی صد پوائنٹ کی برتری حاصل ہے۔

جان میک کین اور براک اوباما دونوں کے بارے میں توقع ہے کہ وہ خود کو ایسے ا میدوار کے طورپر پیش کریں گے جو ملک کو حالیہ اقتصادی بحران سے نکالنے کے لیے بہترین صلاحیتوں کا حامل ہے۔