غزہ کی پٹی پر کنٹرول رکھنے والے حماس کے عہدے داروں نے ہڑتال کرنے والے فلسطینی اساتذہ کو خبردار کیا ہے کہ وہ بدھ کے روز کام پر واپس آجائیں ورنہ انہیں اپنی ملازمتوں سے محروم ہونا پڑے گا۔

غزہ میں فلسطینی اساتذہ اور صحت سے متعلق کارکن  حماس کی پالیسیوں کے خلاف احتجاج کرتے ہوئے لگ بھگ دو ماہ سے ہڑتال پر ہیں۔حماس کے عہدے داروں نے کہا ہے کہ اساتذہ نے اگر بدھ  کےر وز تک اپنی ہڑتال ختم نہ کی تو انہیں  اپنی ملازمتوں پر واپس آنے کی اجازت نہیں دی جائے گی۔

فلسطینیوں کی غیر جانب دار نیوز ایجنسی معان نے کہا ہے کہ کارکنوں کی نمائندہ لیبر یونینز نے اس انتباہ کو مسترد کردیا ہے اور کم ازکم ایک اور ہفتے تک ہڑتال جاری رکھنے کا عزم ظاہر کیا ہے۔

 ہڑتالیوں نے حماس کے عہدے داروں پر الزام عائد کیا ہے کہ وہ ان عوامی کارکنوں کو ملازمتوں سے برخواست اور ان کے تبادلے کررہے ہیں جو حریف فتح تحریک کی حمایت کرتے ہیں جس کا مغربی کنارے پر غلبہ ہے۔ حماس نے ہڑتال کی مذمت کرتے ہوئے کہا ہے کہ اس کا محرک سیاسی ہے۔