باجوڑایجنسی میں حکومتی عملداری کی بحالی کے لیے سیکورٹی فورسزکی جانب سے مختلف علاقوں میں عسکریت پسندوں کے خلاف کاروائیاں جاری ہیں ۔

جمعہ کی شام جیٹ طیارو ں نے تحصیل ماموند کے علاقہ بدان پر بمباری کی ۔ جس کے نتیجے میں بارہ عسکریت پسند ہلاک جبکہ دو مقامی خواتین سمیت چار افراد زخمی ہوگئے ہیں ۔ باجوڑایجنسی کے مقامی انتظامیہ کے ایک اعلی اہلکار نے دعویٰ کیا کہ پاکستانی گن شپ ہیلی کاپٹرو ں نے عسکریت پسندوں کے ایک اہم علاقہ میں فضائی کاروائی کے دوران دس جنگجوؤں کو ہلاک کیاہے ۔

 انھوں نے دعوی کیا کہ گن شپ ہیلی کاپٹروں نے عسکریت پسندوں کے ٹھکانوں کو اُس وقت نشانہ بنایا جب وہاں پر موجود مقامی اور کچھ غیر ملکی جنگجو سیکورٹی فورسز پر حملہ کرنے کی تیاریاں کررہے تھے ۔

 سیکورٹی فورسز نے گن شپ ہیلی کاپٹروں کی مدد سے کی جانے والی کاروائی میں چار غیرملکی جنگجوؤں کی ہلاکت کا دعویٰ کرتے ہوئے کہا کہ ہفتے کو ہونے والی کاروائیوں میں چار غیر ملکی اورچھ ا ہم ملکی عسکریت پسندکمانڈر مارے گئے ہیں ۔ دریں اثناء باجوڑایجنسی کے علاقہ چہارمنگ سے نامعلوم مسلح افراد کے ہاتھوں اغوا ہونے والے چار عمائدین کی لاشیں چہارمنگ کے علاقہ تنگی میں سڑک کے کنارے سے ملی ہیں ۔

اسسٹنٹ پولیٹکل ایجنٹ ناوگئی محمد جمیل خان کے مطابق چہارمنگ کے ان چاروں قبائلی عمائدین کو جمعرات کے روزباجوڑ کے صدرمقام خار سے تقریبا 30 کلومیٹر دور کوٹکی نامی علاقہ سے اس وقت اغو ا کی گئے تھے جب وہ ایک قبائلی جرگہ میں شرکت کی بعد واپس اپنے گھر جارہے تھے ۔

 علاقہ کے مقامی لوگوں کے مطابق مسلح افراد نے ملک داستان ، جمالدار خان ،امان گل اور ثناء گل کو قتل کرنے کے بعد ان کی لاشوں کو کوٹکی سے پانچ کلومیٹر دور تنگی نامی علاقہ میں خشک نہر کے پاس پھینک دیا تھا ۔

 مسلح افراد کے ہاتھوں ان عمائدین کے سفاکانہ قتل کرنے پر انتہائی غم و غصہ کا اظہار کیاہے تا ہم کسی نے اب تک اس کی ذمہ د اری قبول نہیں کی۔ اور مقامی قبائل نے علاقہ میں عسکریت پسندوں کے خلاف موثر کاروائی شروع کرنے کا فیصلہ کیاہے ۔