برطانیہ کی ایک نجی فضائی کمپنی نے حیاتیاتی تیل کو بطور ایندھن استعمال کرنے کا کامیاب تجربہ کیا۔ ورجن اٹلانٹک کے ایک طیارے نے لندن سے ایمسٹرڈیم تک پرواز کی، تاہم طیارے میں مسافروں سوار نہیں کیا گیا۔

طیارے میں استعمال ہونے والا اندھن باباسو اور ناریل کے تیل سے تیار کیا گیا تھا، جس سے فضا میں کاربن ڈائی آکسائیڈ کے اخراج کی مقدار کم ہوتی ہے۔ فضائی کمپنی کے سربراہ رچرڈ برانسن نے اس تجربے کو انڈسٹری کے لئے اہم قرار دیتے ہوئے کہا کہ یہ ثابت ہو چکا ہے کہ پٹرول اور ڈیزل کے علاوہ اور بھی ذرائع استعمال کئے جا سکتے ہیں۔

کمپنی ترجمان کے مطابق اس پرواز کا متعلقہ ڈیٹا اکٹھا کرنے میں چند ہفتے لگ سکتے ہیں جس کے بعد یہ فیصلہ کیا جائے گا کہ حیاتیاتی تیل کو بطور ایندھن استعمال کرنا کتنا فائدہ مند ہو سکتا ہے۔