جمعرات کے روز برسلز میں نیٹو کے وزرائے دفاع کی دو روزہ کانفرنس شروع ہورہی ہے جس میں کوسوو، افغانستان اوریورپی میزائل ڈیفنس پروگرام پرتوجہ مرکوز ہوگی۔

توقع ہے کہ امریکی وزیرِ خارجہ اپنے اتحادیوں پر زور دیں گے کہ وہ افغانستان میں نیٹو کے مشن کے لیے مزید فوجی بھیجنے کا وعدہ کریں۔ یہ توقع بھی کی جارہی ہے کہ وزرائے دفاع شورش زدہ جنوبی افغانستان میں فوجی دستوں کی باری پرملنے والی کمان پر بھی گفتگو کریں گے۔

نیٹو کے وزرا پولینڈ اور جمہوریہ چیک میں میزائل ڈیفنس سسٹم کی تنصیب کے امریکی منصوبے پر بھی بات چیت کریں گے۔ امریکہ کا کہنا ہے کہ اس نظام کا مقصد ایران جیسے ممالک سے میزائل حملوں کے خطرے کو روکنا ہے۔تاہم روس اس منصوبے کا شدید مخالف ہے۔

کوسوو بھی کانفرنس کے ایجنڈے کا ایک اہم موضوع ہے۔ کوسوو آنے والے دنوں میں ایک نئے آئین لانا چاہتاہے لیکن وہاں پر موجود نیٹو کے 16 ہزار امن فوجیوں کے کردار کے حوالے سے بہت سے سوالات موجود ہیں۔ کوسوو کے اعلانِ آزادی کو 26 ممالک پر مشتمل نیٹو اتحاد کے تمام ارکان نے ابھی تک تسلیم نہیں کیا ہے۔