نائین الیون کے دہشت گرد حملوں کی وجوہات اور اس سے منسلک دوسرے پہلوؤں کے حوالے سے نومبر2002 میں نائین الیون کمشن قائم کیا گیا۔  کمشن نے دس ممالک کے تقریباً 1200 افراد کے انٹرویوز کے بعد ایک رپورٹ شائع کی جسے نائین الیون کمشن رپورٹ کہا جاتا ہے۔  وائس آف امریکہ نے اس رپورٹ کے بارے میں کمشن کے ایک ممبر رچرڈ بن ونیسٹےاور کو چیئر مین لی ایچ ہیملٹن سے بات کی۔

رچرڈ بن ونیسٹے کا کہناتھا کہ میرے خیال میں عراق جنگ کی وجہ سے ہم پوری طرح القاعدہ کے پیچھے نہیں جاسکے اور اسامہ بن لادن اور ایمن الظہواہری کو انصاف کے کٹہرے میں نہیں لاسکے اور نہ ہی طالبان کو ختم کرسکے جو اب دوبارہ زور پکڑ رہے ہیں۔  پاکستان میں افغان سرحد کے ساتھ القاعدہ کے لیے پناہ گاہوں میں بھی اضافہ ہوا ہے۔

انہوں نے کہا کہ جیسا کہ ہم نے اپنی نائیں الیون کی رپورٹ میں کہا ہے کہ دہشت گردی کے خلاف مناسب اقدامات اور ہماری شہری آزادیوں میں ایک توازن ہونا چاہیے اور ان شہری آزادیوں کو تحفظ دیتے ہوئ, ہم ان اصولوں کو تحفظ دیتے ہیں جن کے لیے یہ ملک وجود میں آیا۔  اگر ہم صرف سیکیورٹی کی بات کرتے ہیں تو پھر ہم وہ اعلیٰ اقدار کھودیتے ہیں جن کے لیے ہم جدوجہد کررہے ہیں۔  

طالبان کا ذکر کرتے ہوئے رچرڈ بن نیسٹے کا کہناتھا کہ وہ یقینی طورپر دوبارہ زور پکڑ رہے ہیں۔  پاکستان کے سرحدی علاقوں کو محفوظ کرنے کے لیے پاکستانی حکومت نے اس طرح کے اقدامات نہیں کیے جن کی ہم ان سے توقع رکھتے تھے۔  پاکستان نے ہماری توقعات کے خلاف ایسے عناصر کو پکڑنے میں کسی حد تک ناکام رہا ہے جو افغانستان میں جمہوری حکومت کے خلاف برسرپیکار ہیں۔  اس لیے ہمیں افغان حکومت کے لیے حمایت میں اضافہ کرنا ہوگا۔

نائین الیون کمشن کے کو چیئرمین لی ہیملٹن کا کہنا تھا کہ اس میں کوئی شک نہیں ہے کہ ہم گیارہ ستمبر 2001 کے مقابلے میں اب زیادہ محفوظ ہیں۔  لیکن اس میں کوئی شبہ نہیں ہے کہ ہم اب بھی اتنے محفوظ نہیں ہیں جتنا کہ ہمیں ہونا چاہیے۔  خود کو محفوظ بنانے کے لیے بہت سے اچھے اقدامات کیے گئے ہیں اور مرکزی ، ریاستی اور مقامی سطح پر بھی بہت کوششیں کی گئی ہیں۔  ان اقدامات سے امریکی عوام کو تحفظ ملا ہے۔

ہیملٹن کا کہناتھا کہ میرے خیال میں ہمیں اور بہت کچھ کرنا ہے۔  اس سلسلے میں میں  جو سب سے زیادہ کمی محسوس کررہا ہوں وہ فوری اقدامات کی ہے۔  اب بیورکریسی میں سست روی سے کام ہورہاہے جو غلط ہے۔  ہمیں اس بارے میں ہاتھ پر ہاتھ دھر کر نہیں بیٹھنا چاہیے۔  دہشت گرد اب بھی ہمیں نشانہ بنانے کی کوشش کررہے ہیں۔ اگران کے پاس ذرائع اور قابلیت ہوئی تو وہ ضرور حملہ کریں گے۔  وہ یہ واضح طور پر چاہتے ہیں اور ہمیں پہلے سے زیادہ بہتر کارکردگی دکھانا ہوگی اور ایسا جلد کرنا ہوگا۔